TurisTalent 5.0, a aceleradora de turismo do Concello de Lugo, amplía ata o 28 de xullo o seu prazo de inscrición

Emprendedores, startups e empresas turísticas aínda están a tempo de presentar os seus proxectos a través da sede electrónica do Concello.

A web do programa (www.turistalent.com) ofrece toda a información, as bases e o formulario para optar a ser unha das 15 ideas innovadoras seleccionadas nesta 1ª edición.

O Concello de Lugo amplía o prazo de inscrición da súa aceleradora de empresas para os sectores turístico e enogastronómico, Turistalent 5.0, ata o próximo luns 28 de xullo. Esta ampliación concede ata 10 días hábiles máis a aqueles emprendedores, startups e empresas do sector que están inmersas no proceso de presentación de candidaturas ou que están sopesando acceder a este pioneiro programa de formación e mentorización empresarial.

A convocatoria está dirixida a proxectos en fase pre-seed (pre-semente) que aposten pola innovación en turismo e en enogastronomía. O programa está aberto a iniciativas que exploren novos enfoques e solucións en ámbitos como o turismo rural, os servizos ao visitante, as axencias de viaxes, os aloxamentos turísticos, o enoturismo, o turismo activo e de aventura, o turismo sostible, a gastronomía local, a mobilidade  turística, a dixitalización de experiencias, a comercialización de produtos turísticos, a tecnoloxía aplicada ao sector, a accesibilidade e inclusión en destinos, ou outros relacionados coa mellora e dinamización do sector.

Turistalent 5.0 é unha iniciativa pioneira a nivel municipal orientada a detectar e acompañar ideas con alto potencial empresarial que contribúan á transformación do ecosistema turístico lucense a través de formación especializada, a mentorización de expertos en diferentes materias e un entorno favorable para o desenvolvemento emprendedor.

Esta convocatoria está dirixida a persoas emprendedoras, equipos promotores e empresas de calquera forma xurídica (incluídas persoas autónomas) de todo o territorio con dispoñibilidade para asistir ás sesións presenciais en Lugo que conten con propostas nos ámbitos turístico ou enogastronómico.

A páxina web da aceleradora (www.turistalent.com) ofrece toda a información relativa ao programa de formación impulsado polo Concello e facilita o formulario de inscrición, así como as instrucións para a súa presentación formal.

Para resolver dúbidas, os interesados poden escribir un correo a info@turistalent.com ou por teléfono no 982 000 000 (de luns a venres, de 09:00 a 14:00 horas).

O itinerario formativo de TurisTalent 5.0

Os 15 proxectos que resulten seleccionados nesta primeira edición da aceleradora accederán a un completo paquete de servizos e vantaxes: mentorización, formación especializada, asesoramento en financiamento e acceso a inversores, visibilidade institucional e mediática, redes de contacto co ecosistema turístico galego e nacional.

O programa conta con catro fases:

    1. Academia: nesta fase, os 15 proxectos seleccionados recibirán sesións de formación e mentoría personalizadas, así como networking con emprendedores e expertos sectoriais.

    2. TurisTalent Day: como colofón da Academia, presentaranse os proxectos ante o Comité Técnico, que avaliará cada un deles e seleccionaranse dez para pasar á seguinte fase.

    3. Aceleración: traballo intensivo en escalabilidade, modelo de negocio e acceso ao mercado. Contarán con acompañamento individual de mentores e especialistas.

    4. Investors Day: presentación final ante un panel de inversores públicos e privados, tanto nacionais como internacionais.

As áreas globais nas que se poden enmarcar os proxectos aspirantes a formar parte do programa de aceleración son Travel Tech (Transformación dixital do turismo, as viaxes e as experiencias), Social Tech (a conexión entre o dixital e a sociedade. Ideas innovadoras para cambiar o Turismo), Gastro Tech (Proxectos 360º do sector gastronómico: produto, restauración, cultura e turismo) e Sostibilidade (Proxectos enfocados a asegurar un desenvolvemento sostible no sector turístico).