O Concello de Lugo pon en marcha a única aceleradora do ámbito turístico actualmente en Galicia: TurisTalent 5.0

O alcalde participou este martes na reunión de lanzamento do programa que incluirá formación especializada, asesoramento técnico e apoio na procura de financiamento.

En xuño abrirase unha convocatoria pública para a presentación de solicitudes; en xullo haberá unha fase de academia; e en setembro arrancará a fase de aceleración.

Miguel Fernández: “Este programa encaixa á perfección na nosa visión de Lugo como unha cidade que aposta polo talento, pola innovación e por un turismo sostible e de calidade”.

A aceleradora enmárcase no Plan de Sostenibilidade Turística en Destino “…Et Edendo, Lucus”, para o que o Goberno Local acadou 2 millóns de euros de fondos europeos.

O alcalde de Lugo, Miguel Fernández, participou este martes na reunión de lanzamento da nova aceleradora TurisTalent 5.0, unha iniciativa pioneira no ámbito municipal destinada a impulsar proxectos emprendedores e innovadores no sector turístico e enogastronómico lucense. O encontro tivo lugar no edificio Impulso Verde, onde se desenvolverá o programa, que terá unha duración máxima de nove meses. Na reunión participaron técnicos municipais da Área de Dinamización Económica, promotora do proxecto, así como representantes da empresa adxudicataria, Dos Espacios Internet Consulting S.L., responsable de deseñar e executar o programa.

Segundo explicou o rexedor, “esta aceleradora encaixa á perfección na nosa visión de Lugo como unha cidade que aposta polo talento, pola innovación e por un turismo sostible e de calidade. Con TurisTalent 5.0 queremos xerar oportunidades reais de emprendemento, apoiando proxectos que aproveiten os nosos recursos propios, como a gastronomía, o patrimonio ou o medio natural”.

Miguel Fernández tamén puxo en valor o edificio Impulso Verde, que acollerá o programa: “Queremos que este espazo se encha de contido útil e transformador, que sexa un lugar onde nazan ideas con futuro e dende o que se diversifique o tecido económico da cidade”.

Durante a sesión de traballo, definíronse os prazos das distintas fases que compoñen esta aceleradora, a única en Galicia, actualmente, centrada de maneira específica no ámbito turístico. Así, a convocatoria pública e captación de proxectos prevese abrir no mes de xuño; en xullo celebrarase a fase de academia, unha fase de formación intensiva para un máximo de 15 proxectos seleccionados; mentres que a fase de aceleración, prevista entre setembro e finais de ano, contará con ata 10 proxectos finalistas, que recibirán acompañamento experto para o seu lanzamento e consolidación.

Un Comité Técnico, composto por profesionais de recoñecido prestixio e ampla experiencia no sector turístico tanto a nivel autonómico como estatal, será o encargado de avaliar as propostas e escoller os proxectos que accedan a cada unha das fases.

TurisTalent 5.0 enmárcase no Plan de Sostibilidade Turística en Destino «…Et Edendo, Lucus», financiado con fondos europeos Next Generation, cun orzamento total de 2 millóns de euros. O contrato foi adxudicado á empresa Dos Espacios Internet Consulting S.L. por un importe de 134.704,77 euros, tras un proceso público ao que concorreron seis ofertas e que foi avaliado por un comité mixto conformado por persoal técnico municipal e da Universidade de Santiago de Compostela.

A través deste programa, o Concello de Lugo reafirma o seu compromiso co desenvolvemento local sostible, a creación de emprego e o apoio a novos modelos de negocio que contribúan a fortalecer o posicionamento turístico de Lugo a nivel autonómico e estatal.