O CEI-Nodus municipal acolle xornadas de formación para o persoal seleccionado de cara á próxima apertura de Primark en Lugo

Esta colaboración entre o Concello e a compañía internacional ten como obxectivo facilitar espazos para a formación e a creación de emprego na cidade.

O Centro de Empresas e Innovación (CEI-Nodus) do Concello de Lugo acolle estes días diversas xornadas de formación dirixidas ao persoal seleccionado para traballar na nova tenda de Primark que abrirá no centro comercial As Termas. Esta colaboración entre o Concello e a compañía internacional ten como obxectivo facilitar a formación e a creación de emprego na cidade.

O CEI-Nodus, un dos centros máis punteiros da provincia en innovación e emprendemento, cedeu os seus espazos para que os futuros traballadores de Primark reciban a formación necesaria para a súa integración no proxecto. Esta iniciativa busca preparar aos empregados para as diversas áreas de actividade que a nova tenda abarca, garantindo un equipo altamente cualificado para atender as necesidades dos clientes e ofrecer un servizo de calidade.

A creación de emprego que xira arredor da apertura de Primark en Lugo será un pulo para a dinamización económica da cidade. O Concello, a través do CEI-Nodus, pon así ao dispor de empresas de gran envergadura como Primark a súa infraestrutura para apoiar tanto a selección de persoal como a súa formación, fortalecendo o compromiso co fomento do emprego e o desenvolvemento económico do municipio.

A posta en marcha desta nova tenda de Primark xenerará un número significativo de postos de traballo, e contribuirá, ademais, á consolidación de Lugo como un polo de atracción comercial e turístico para a provincia.

Neste senso, o Concello de Lugo reitera o seu compromiso coa mellora das condicións laborais e co desenvolvemento económico da cidade, continuando co seu apoio á creación de postos de traballo e á formación profesional a través de iniciativas como esta.