Miguel Fernández: “A apertura de Primark confirma que Lugo é unha cidade atractiva para o investimento e a creación de emprego”

O rexedor, acompañado da voceira municipal Ana Abelleira, participou na inauguración do novo establecemento, situado na planta baixa do centro comercial As Termas.

A apertura desta tenda supuxo a contratación de 75 persoas, as cales recibiron 1.662 horas de formación, máis da metade delas realizadas de forma presencial no CEI-Nodus.

Fernández: “Apoiamos a chegada de grandes compañías, ao tempo que defendemos ao pequeno comercio, son dous modelos que poden convivir e alimentarse mutuamente”.

“Seguiremos traballando para atraer proxectos que creen riqueza, desenvolvemento e futuro para o noso municipio”, subliñou o alcalde.

O alcalde de Lugo, Miguel Fernández, acompañado pola portavoz do Goberno Local, Ana González Abelleira, participou esta mañá no acto de inauguración da nova tenda de Primark no centro comercial As Termas, o primeiro establecemento da cadea téxtil irlandesa na cidade.

A nova tenda, situada na planta baixa do centro comercial, conta cunha superficie de 2.400 metros cadrados e incorpora o novo concepto de deseño comercial da compañía, sendo a primeira en España e a terceira a nivel mundial con esta nova imaxe.

Durante o acto, o rexedor destacou a importancia desta apertura para Lugo, tanto polo impacto económico como pola xeración de emprego: “A chegada de Primark a Lugo supón moito máis ca unha nova apertura comercial. É a confirmación de que a nosa cidade segue sendo atractiva para grandes marcas internacionais, que ven en Lugo unha cidade dinámica, en crecemento e con potencial para o desenvolvemento económico”.

O novo establecemento conta cun equipo de 75 persoas, as cales recibiron 1.662 horas de formación, máis da metade impartidas de forma presencial no CEI-Nodus, o Centro de Empresas e Innovación do Concello de Lugo. Neste senso, Miguel Fernández puxo en valor a colaboración público-privada: “O Concello puxo a disposición de Primark as instalacións do CEI-Nodus para desenvolver xornadas de formación do novo persoal. Esta cesión forma parte do noso compromiso firme coa creación de emprego e co apoio a proxectos que contribúan ao benestar dos nosos veciños e veciñas”.

Neste senso, o alcalde tamén quixo deixar clara a compatibilidade entre o apoio á implantación de grandes compañías e o respaldo ao comercio local: “Defendemos e apoiamos decididamente o pequeno comercio, como vimos facendo con distintas iniciativas ao longo do ano, pero iso non é incompatible co acompañamento a proxectos de gran dimensión como este. Son dous modelos que poden convivir e incluso alimentarse mutuamente. A presenza de grandes marcas como Primark serve tamén de tractor para que máis xente de toda a provincia —e incluso doutros territorios— veña a Lugo, pase o día, compre, consuma e dinamice a economía do conxunto da cidade. É unha oportunidade para todos e todas”.

Finalmente, Miguel Fernández agradeceu a confianza que Primark depositou na cidade e reiterou a vontade do Goberno Local de continuar colaborando con empresas que aposten por Lugo: “Seguiremos traballando para atraer proxectos que creen riqueza, desenvolvemento e futuro para o noso municipio”.