A alcaldesa inaugura o primeiro Coliving municipal dedicado á creación artística, que suporá un novo impulso ao barrio do Carme

Paula Alvarellos sinalou que esta dotación nace co obxectivo de “ser catalizador da creatividade e do desenvolvemento profesional no ámbito cultural, pero tamén de contribuír á rexeneración desta zona estratéxica de Lugo”.

O centro disporá dunha programación propia orientada a todos os publicos, que se prolongará ata finais de ano, momento a partir do cal entrará en funcionamento  o Regulamento das Residencias Artísticas Internacionais do Coliving.

O Goberno local programa para outono varias sesións orientadas a profesionais e axentes especializados no sector artístico que servirán para divulgar o proxecto e supoñerán a antesala do que será o funcionamento ordinario.

A alcaldesa de Lugo, Paula Alvarellos, acompañada do edil de Dinamización Económica, Mauricio Repetto, inaugurou hoxe o primeiro Coliving artístico municipal dedicado ao arte, no que supón ademais un novo impulso á revitalización do barrio do Carme. A inauguración tivo lugar no exterior do centro, construído ao pé do Camiño Primitivo, tras a rehabilitación por parte do Goberno local do que fora a vivenda do pintor e escultor Gómez Pacios.

Na apertura desta vangardista dotación, a alcaldesa sinalou que “nace co obxectivo de ser catalizador da cretividade e do desenvolvemento profesional no ámbito artístico e cultural, pero tamén para contribuír á rexeneración desta zona estratégica de Lugo. Con este acto arrinca a actividade nesta nova dotación artística para dar a coñecer o edificio entre a cidadanía e os axentes culturais da comunidade”. Iso será ata primeiros do 2025, cando se prevé que entre en funcionamento o Regulamento das Residencias Artísticas Internacionais do Coliving.

Precisamente, moitos representantes do colectivo artístico, cultural e educativo de Lugo estiveron presentes nesta inauguración para percorrer unhas instalacións que supuxeron a construción dunha nova edificación e da recuperación de 3.000 m2 de zonas verdes ao seu carón, que se habilitarán como zona cultural aberta a toda a cidadanía e que contará con programación propia.

A reforma permitiu dotar á construción de tres zonas individuais de descanso e doutros espazos comúns, áreas de traballo e talleres, nun espazo que ademais de servir para inspirar a os novos creadores e a os seus proxectos artísticos, sexa tamén unha homenaxe á figura e ao legado artístico de Pacios.

Trátase dunha intervención totalmente respectuosa coa contorna, que supuxo un investimento de 490.978 €, financiada nun 80% con fondos FEDER da Unión Europea, e enmarcado na estratexia DUSI Muramiñae, para unir a trama urbana de Lugo coa súa contorna fluvial, e neste caso tomando a cultura como elemento dinamizador da economía local e tamén do barrio do Carme.

Tal e como explicou hoxe a alcaldesa “xa se están a elaborar as bases das Residencias Artísticas Internacionais do Coliving, que regularán a convocatoria para que as e os artistas interesados poidan optar a becas coas que acceder ao Coliving durante tres meses, para desenvolver a súa obra que despois mostrarán ao público na área expositiva deste mesmo centro”.

Nestes seis meses, o traballo do Executivo de Paula Alvarellos, pasa por dar a coñecer este novo equipamento. “O calendario cultural e artístico consistirá  en actividades que se desenvolverán este verán, orientadas a un público familiar”. Así, nas vindeiras semanas está previsto un taller de recoñecemento natural da contorna do Coliving, a cargo dunha artista contemporánea e paisaxista experta en vexetación urbana como é Noa Rodríguez, ou un paseo dinamizado polo Carme e exploración da botánica urbana. Mentres, “os eventos programados para o outono, se dirixen ao sector profesional e suporán a antesala  do que será o funcionamento ordinario do colinving a partir de 2025”, explicou Mauricio Repetto.

Así, hai programados obradoiros interactivos sobre a contorna e a conexión coa natureza nesta instalación, e incluirá actividades prácticas como debuxo, construción e exploración sensorial. “Trátase de divulgar as posibilidades do centro entre a cidadanía en xeral-, sinala o edil de Dinamización Económica do Executivo de Paula Alvarellos-, pero achegándonos tamén ao tecido artístico local, procurando un equilibrio entre o encontro de axentes especializados e a exhibición de talento local”. Á faceta artística se suma a empresarial, xa que tal e como explicou Mauricio Repetto, o Coliving artístico contará co acompañamento profesional do CEI-Nodus, asesorando aos residentes que así o desexen para poñer en marcha novos proxectos empresariais na cidade”.