Lugo avanza na implantación dun modelo de reparto sostible apostando pola inclusión social a través do proxecto europeo Socilibre

O Concello vén de licitar por un importe de 32.404,99 € a elaboración dun estudo de viabilidade para desenvolver un modelo de reparto de última milla no municipio.

«Queremos ser referentes en mobilidade limpa, cohesión social e innovación urbana. Socilibre encaixa á perfección coa nosa estratexia de cidade máis sostible, conectada e inclusiva», destacou Miguel Fernández.

Este luns tivo lugar unha nova reunión de seguimento do proxecto, coa participación de representantes do Concello e da Cámara de Comercio de Braga, así como da Cruz Vermella.

O Concello de Lugo continúa a consolidar o seu liderado en políticas urbanas sostibles e inclusivas a través da súa participación no proxecto europeo Socilibre, cofinanciado ao 75% polo Fondo Europeo de Desenvolvemento Rexional (FEDER) no marco do Programa Interreg Europe 2021-2027.

Esta mañá tivo lugar unha nova reunión de seguimento do proxecto na cidade, coa participación do alcalde Miguel Fernández, acompañado por técnicos municipais da Área de Dinamización Económica, representantes do Concello e da Cámara de Comercio e Industria de Braga, así como de entidades socias como Cruz Vermella Española e Cruz Vermella de Braga.

O rexedor destacou a importancia do proxecto para avanzar nun modelo de cidade máis humano e sostible: «Socilibre non só aposta pola redución de emisións e a mellora do reparto urbano, senón tamén por ofrecer oportunidades reais de emprego digno para persoas en risco de exclusión social», lembrou.

O Concello de Lugo, que recibe unha asignación de 148.612,86 € dentro do proxecto (dos cales 111.459,64 € son fondos FEDER), vén de licitar por un importe de 32.404,99 € a elaboración dun estudo de viabilidade para desenvolver un modelo de reparto de última milla no municipio.

“A primeira reunión da mesa de contratación celebrouse o pasado 20 de xuño, tras a cal se abriu un prazo de cinco días hábiles para que as empresas presentasen documentación adicional. En total, foron rexistradas 8 ofertas, mostra do interese que está a xerar esta iniciativa pioneira”, apuntou Fernández. A previsión é que a adxudicación se resolva nesta primeira quincena de xuño, tralo cal a empresa seleccionada disporá de dous meses para a elaboración do estudo.

Este documento permitirá sentar as bases para a implantación dunha rede de reparto urbano baseada en bicicletas de carga, con centros loxísticos situados na periferia e operando na nova Zona de Baixas Emisións (ZBE) de Lugo. Esta zona comprenderá todo o interior do recinto amurallado da cidade, que concentra unha importante densidade de comercio, servizos e hostalaría.

A implantación da ZBE implicará restricións de acceso, circulación e estacionamento de vehículos, co fin de mellorar a calidade do aire, reducir as emisións de gases de efecto invernadoiro e o ruído. Neste contexto, o modelo de reparto con bicicletas de carga contribuirá a acadar estes obxectivos ambientais.

Formación e inserción de colectivos vulnerables

O proxecto Socilibre ten como outro eixo principal a formación e inserción laboral de colectivos en risco de exclusión social, en particular persoas refuxiadas e inmigrantes, tanto en Lugo como en Braga. Os beneficiarios integraranse nunha rede loxística de reparto de última milla con vehículos de cero e/ou baixas emisións, facilitando a distribución de mercancías na nova Zona de Baixas Emisións (ZBE).

O encontro deste luns tivo como obxectivo avanzar nas liñas de traballo previstas no marco do proxecto, que está liderado pola Cámara Municipal de Braga e do que tamén forman parte como entidades beneficiarias o Concello de Lugo; a Asociación Empresarial de Braga (AEBraga); a Universidade do Miño; a Empresa Municipal BragaHabit; a Cruz Vermella Lugo e a Cruz Vermella Portuguesa.

Unha estratexia integrada: Lugo Novo Norte

O impulso a esta mobilidade sostible tamén se integra dentro das estratexias do Plan de Actuación Integrado (PAI) de Lugo Novo Norte, que contempla a rexeneración urbana de varios barrios do norte da cidade, a reordenación do tráfico, o aumento de zonas peonís e a mellora da accesibilidade. Entre as actuacións previstas destaca a transformación da Avenida da Coruña nun gran bulevar verde, cunha senda preferentemente peonil que conectará este eixo co centro histórico e co resto da cidade.