O Arquivo Municipal estrea nova web para facilitar á cidadanía un acceso áxil a este servizo “gardián do patrimonio documental lucense”
21 noviembre, 2024
O Executivo de Alvarellos felicita ao alumnado que completou a súa formación en deseño gráfico, desenvolvemento web e dixitalización no CEI Nodus
22 noviembre, 2024
As bases xa están dispoñibles na web municipal, e o prazo de inscrición estará aberto ata o 27 de novembro.
A Praza Maior converterase novamente nun espazo de dinamización económica e social con turnos que permitirán a participación de máis negocios locais.
Mauricio Repetto subliña que “este mercado é unha oportunidade única para impulsar o comercio de proximidade e encher Lugo co espírito do Nadal”.
O Concello de Lugo abre oficialmente o prazo para participar no Mercado de Nadal, «Nadalmente Lucense», que terá lugar na Praza Maior do 5 de decembro ao 5 de xaneiro. Este evento, consolidado como un dos puntos de referencia das festas na cidade, busca dinamizar o comercio de proximidade e converter o centro nun espazo cheo de vida e ilusión.
O concelleiro de Dinamización Económica, Mauricio Repetto, destacou o impacto positivo deste mercado para o comercio local: “Queremos que este Nadal, os negocios de Lugo teñan unha plataforma única para exhibir a calidade e variedade dos seus produtos. Ademais, contribuímos a facer da nosa cidade un referente en experiencias navideñas”. Ademais, o edil puxo en valor “o traballo constante que levamos a cabo dende o Goberno local para impulsar iniciativas de apoio ao comercio de proximidade, tanto en datas sinaladas como en outros momentos de menor intensidade nos que é importante desestacionalizar a demanda”. “Para este executivo é fundamental respaldar este sector estratéxico, xerador de emprego e motor da cidade”, concluiú.
Os interesados en participar deberán presentar a súa solicitude antes do 27 de novembro a través da sede electrónica do Concello ou presencialmente no rexistro municipal. Alternativamente, tamén poderán rexistrarse noutras administracións, sempre que envíen unha copia ao correo electrónico cei@lugo.gal. Xunto co formulario oficial (Anexo I), será necesario achegar: certificados de estar ao corrente coa AEAT, Xunta de Galicia e Seguridade Social; copia do DNI ou CIF; documento acreditativo de alta na TGSS; memoria detallada cos produtos que se van expor, incluíndo fotografías recentes; e a póliza e recibo actualizado do seguro de responsabilidade civil.
As solicitudes admitiranse para diferentes quendas semanais: quenda 1, d+o 5 ao 15 de decembro; quenda 2, do 16 ao 22 de decembro; quenda 3, do 23 ao 29 de decembro; e quenda 4, do 30 de decembro ao 5 de xaneiro.
“Un dos obxectivos principais é garantir a participación equitativa e a diversidade de produtos en cada quenda, para que tanto os comerciantes coma o público poidan desfrutar dunha experiencia única en cada visita ao mercado”, afirmou Repetto.
Un nadal máxico na Praza Maior
O Mercado de Nadal contará con casetas decoradas, iluminación especial e un horario amplo: de 11:00 a 14:30 e de 16:30 a 21:00 horas, excepto os días 24 e 31 de decembro, con horario reducido ata as 14:30 horas, e os días 25 e 1 de xaneiro, cando permanecerá pechado. Repetto concluíu animando á participación: “Cada negocio que se sume contribúe a facer máis especial esta época. O Nadal é unha ocasión para celebrarmos o talento local e fortalecermos o comercio de proximidade, dando á Praza Maior o protagonismo que merece como punto de encontro”.
As bases completas están dispoñibles na web do Concello de Lugo, na seguinte ligazón, onde tamén se publicarán as resolucións de adxudicación antes do 3 de decembro. Para calquera dúbida, os interesados poden contactar a través do correo cei@lugo.gal.
