Lugo, protagonista da plataforma-documental Future of Timber, sobre a construción en madeira en Europa, da fundación Built by Nature

O audiovisual promovido pola fundación holandesa, unha das entidades promotoras da rede Mass Madera á que pertence o Concello, enmárcase no proxecto Evolving Forest.

A peza pode visionarse a través da web: https://www.evolvingforests.com/bioregionalism-future-of-timber

O Concello de Lugo é un dos protagonistas da recentemente estreada plataforma-documental Future of Timber (https://www.evolvingforests.com/future-of-timber) impulsada pola fundación holandesa Built by Nature, unha das entidades promotoras da rede Mass Madera á que pertence a administración local. A rexedora, Paula Alvarellos, xunto a técnicos municipais, participou na gravación dun audiovisual enmarcado no proxecto Evolving Forest, a través do que se están a realizar unha serie de curtos sobre como impulsar a construción en madeira en Europa.

Neste senso, a alcaldesa destacou a escolla do Concello de Lugo “como exemplo de desenvolvemento sostible, destacando o papel proactivo que exercemos como administración, levando a cabo a implantación de medidas e de políticas que apostan pola resiliencia fronte ao cambio climático, consecuentes e responsables coa realidade ambiental que vivimos e, sobre todo, acordes aos retos que as cidades debemos asumir nese sentido, apostando pola conservación dos bosques e polo seu aproveitamento respectuoso e sostible como xerador de riqueza e de dinamización industrial”.

O equipo de Evolving Forest mostrou o seu interese en coñecer as instalacións do Impulso Verde, co obxectivo de dalo a coñecer internacionalmente como exemplo de edificación sostible, mediante esta nova plataforma-documental, así como o modelo de cidade que está a impulsar o goberno local da man da alcaldesa, Paula Alvarellos. A peza pode visionarse a través da web: https://www.evolvingforests.com/bioregionalism-future-of-timber

Mass Madera

O Concello de Lugo, xunto a Cuenca e Barcelona, foi unha das tres Administracións locais que impulsaron a creación de Mass Madera, unha plataforma integrada por laboratorios, gabinetes de arquitectura, empresas forestais, de enxeñería e montaxe, industrias especializadas e tamén promotores, Star Ups e organizacións públicas que naceu coa vontade de tecer redes colaborativas que axuden a acelerar o uso da madeira como solución á redución de emisións asociadas co sector da edificación. Un aspecto no que a institución lucense é xa todo un referente a nivel nacional e internacional.