Adxudicada a cafetería do CEI, que retomará a súa actividade nas vindeiras semanas
21 octubre, 2024
O Coliving Artístico Municipal acolle unha xornada de portas abertas para informar ó sector da arte e da cultura das posibilidades do centro
23 octubre, 2024Alumnado do IES Muralla Romana coñece o CEI-Nodus e as súas oportunidades de emprendemento
Vinte estudantes da asignatura Iniciativa Emprendedora, pertencentes aos ciclos de Administración de sistemas informáticos en rede e Asesoría de imaxe persoal e corporativa, participaron na visita.
«É esencial que os mozos e mozas coñezan as ferramentas dispoñibles para desenvolver os seus proxectos», afirmou Mauricio Repetto.
Vinte estudantes da asignatura de Iniciativa Emprendedora do IES Muralla Romana, entre os que se atopaban dous alumnos do ciclo de Administración de sistemas informáticos en rede e dezaoito de Asesoría de imaxe persoal e corporativa, visitaron as instalacións do CEI-Nodus. O obxectivo da visita foi descubrir as oportunidades de emprendemento e o apoio que este espazo ofrece a novos proxectos empresariais.
Mauricio Repetto, concelleiro de Dinamización Económica, destacou a relevancia de “facer visible o potencial das iniciativas impulsadas polo Goberno local que ofrecen ferramentas de desenvolvemento profesional a aqueles que están a formarse”. Subliñou que o CEI-Nodus é «un recurso fundamental para reter o talento na cidade e fomentar iniciativas innovadoras que poidan xerar valor e emprego local».
Durante o percorrido, o alumnado puido coñecer as áreas do CEI-Nodus e comprender como o viveiro de empresas facilita o desenvolvemento de proxectos empresariais desde as súas primeiras fases ata a súa consolidación. Deste xeito visitaron todos os servizos asesoramento laboral e de emprego, o obradoiro Arquivalugo, o espazo do programa Europe Direct-Lugo, ás asociacións que levan a cabo a súa actividade desde o seo do Centro de Empresas e Innovación (Federación de Asociacións de Ámbito Social de Lugo (FADAS), Asociación de Xóvenes Empresarios (AJE), Asociación de Mulleres Empresarias (AELU), e a Asociación de Distribuidores de Hostalaría e Alimentación (ADIS Lugo)). Ademais, intercambiaron experiencias de primeira man con varios emprendedores que impulsan os seus proxectos desde este espazo, como ADATI, Festigaleiros, Glisando – Centro de Estudos Musicais, Ivobodyart ou a coach Paula Núñez. Cada un compartiu a súa experiencia, destacando o apoio recibido polo CEI-Nodus ao longo das diferentes fases dos seus negocios.
O CEI-Nodus, dúas décadas de apoio ao emprendemento
Con máis de vinte anos de traxectoria, o CEI-Nodus destaca como un referente no fomento de novas empresas en Lugo. Conta con 23 espazos para o desenvolvemento empresarial, ademais de talleres, laboratorios e áreas de coworking. O centro ten apoiado o crecemento de máis de 100 proxectos empresariais, cunha taxa de supervivencia superior ao 75%, contribuíndo á creación de emprego e ao impulso do talento local.
Repetto finalizou afirmando que “estas visitas son clave para achegar o espírito emprendedor aos mozos e mozas, ofrecéndolles a oportunidade de visualizar un futuro profesional radicado en Lugo”.
